ایڈیشنل ڈپٹی کمشنر فنانس ظہیر لیاقت نے کہا کہ اسپیشل افراد معاشرے کا اہم حصہ ہیں، اسپیشل افراد کو معاشرے کا باعزت شہری بنانے کے لیے حکومت پنجاب تمام وسائل بروئے کار لارہی ہے،سرکاری محکموں میں اسپیشل افراد کے لئے تین فیصد کوٹہ پر بھرتی یقینی بنائی جائے گی، ان خیالات کا اظہار انہوں نے سپیشل افراد کی مالی امداد کے حوالے سے منعقدہ اجلاس کی صدارت کرتے ہوئے کیا،ڈپٹی ڈائریکٹر سوشل ویلفیئرثمن اعجاز،محمد عثمان،خدیجہ کاظمی اور عبدالمنان موقع پر موجود تھے۔ایڈیشنل ڈپٹی کمشنر فنانس ظہیر لیاقت نے کہا ہے کہ سپیشل افراد کی طرف سے مالی امداد کے لئے مجموعی طور پر 39 درخواستیں موصول ہوئی ہیں جن میں سے ایک درخواست ویل چیئر اور ایک درخواست ٹرائی سائیکل کے لئے موصول ہوئی،درخواستوں کی جانچ پڑتال کے بعد ان افراد کو مالی امدادکے چیک تقسیم کئے جائیں گے۔ انہوں نے محکمہ سوشل ویلفیئر کے افسران کو ہدایت کی کہ درخواستوں کی جانچ پڑتال کے دوران شفافیت کو برقرار رکھا جائے۔